Në Gjykatën e Lartë Angleze “Royal Court of Justice” po zhvillohet një betejë ligjore mes mbrojtjes dhe drejtësisë britanike për të shmangur ekstradimin e pesë personave të dyshuar për përfshirje në vrasjen e biznesmenit shqiptar Ardian Nikulaj.
Prej orës 11:30 të ditës së enjte, avokatët e Edmond Haxhisë – shtetas shqiptar me pasaportë britanike – dhe katër britanikëve Thomas Mithan, Steven Hunt, Harry Simpson dhe Harriet Bridgeman, po përpiqen të bindin gjyqtarin Mr. Justice Swift të japë leje për apel ndaj vendimit të 27 gushtit 2024, i cili miratoi ekstradimin e tyre drejt Shqipërisë.
Sipas gazetarit të Top Channel, Muhamed Veliu, mbrojtja po përdor si argument kryesor Konventën Europiane për të Drejtat e Njeriut, në përpjekje për të bindur gjykatën se ekstradimi do të cenonte të drejtat e tyre themelore. Deri më tani, gjyqtari nuk është treguar i bindur nga argumentet e paraqitura.
Autoritetet shqiptare e akuzojnë Edmond Haxhin si organizatorin e planit kriminal, i cili mbërriti në Shqipëri në shkurt 2023 me pretekstin e një fejesë, ndërsa katër të tjerët dyshohet se morën pjesë në survejimin e lëvizjeve të viktimës.
Prokuroria e Lezhës pretendon se posedon prova filmike dhe shkencore të pakundërshtueshme që vërtetojnë përfshirjen e tyre në ndihmën për ekzekutimin e Nikulajt, i cili u qëllua për vdekje me 6 plumba në ambientet e restorantit të tij “Coral”.
Vrasësi Ruben Saraiva, i rekrutuar në Angli, u largua nga Shqipëria përmes Greqisë menjëherë pas krimit, duke përfunduar në Marok, ku u arrestua dhe më pas u ekstradua në Shqipëri më 31 dhjetor 2023.
Ndërkohë, të dyshuarit e tjerë u arrestuan në Angli në maj 2023, pas lëshimit të urdhër-arresteve ndërkombëtare nga Gjykata e Lezhës. Ata vazhdojnë të luftojnë ligjërisht për të shmangur përballjen me drejtësinë shqiptare.