Departamenti Amerikan i Shtetit ka konfirmuar se vendet e Ballkanit janë përfshirë në kuadër të një strategjie më të gjerë të Uashingtonit për dëbimin e emigrantëve pa status të rregulluar, por nuk ka dhënë detaje mbi natyrën e bashkëpunimit.
Në një përgjigje për Radion Evropa e Lirë, Departamenti nënvizoi se “partnerët amerikanë dhe udhëheqësit rajonalë po punojnë ngushtë për t’i dhënë fund migrimit të paligjshëm dhe masiv”, duke theksuar se zbatimi i kësaj politike mbetet një ndër prioritetet kryesore të administratës së presidentit Donald Trump.
Këto deklarata vijnë në vazhdën e raportimeve të mediave amerikane si Bloomberg dhe Wall Street Journal, të cilat shkruajnë se Uashingtoni po përpiqet të bindë vende të Ballkanit – përfshirë Serbinë, Kosovën dhe Moldavinë – që të pranojnë emigrantë të dëbuar nga SHBA, veçanërisht shtetas nga Kuba, Haiti, Nikaragua dhe Venezuela, të cilëve u është hequr statusi i përkohshëm ligjor.
Departamenti i Shtetit refuzoi të komentojë mbi detajet e këtyre negociatave diplomatike, duke thënë se bashkëpunimi ndërkombëtar është thelbësor për ruajtjen e sigurisë kufitare dhe kthimin e atyre që nuk kanë bazë ligjore për të qëndruar në SHBA.
“Çdo shtet duhet të pranojë shtetasit e vet. Në disa raste, mund të bashkëpunojmë edhe me vende të treta për lehtësimin e largimit të emigrantëve,” thuhet në deklaratë.
Nga autoritetet e Kosovës nuk ka ende një reagim zyrtar mbi këto raporte. Ndërkohë, shqetësimet për ndikimin politik dhe social që një marrëveshje e tillë mund të ketë në rajon mbeten të hapura.