Një zjarr i përmasave të konsiderueshme ka rënë sot në një banesë dykatëshe në lagjen “Uznovë” të qytetit të Beratit. Flakët shpërthyen në katin e parë të shtëpisë dhe më pas u përhapën me shpejtësi në pjesë të tjera të godinës.
Fatmirësisht, në momentin e rënies së zjarrit, asnjë prej banorëve nuk ndodhej në shtëpi. Banorët e zonës, të alarmuar nga tymi dhe flakët, njoftuan menjëherë shërbimin zjarrfikës, i cili reagoi me tre mjete të posaçme dhe arriti të lokalizojë dhe shuajë zjarrin në kohë rekord.
Sipas të dhënave paraprake, shkaku i zjarrit dyshohet të ketë qenë një shkëndijë elektrike. Si pasojë e flakëve, banesa e shtetasit Riza Kaçi ka pësuar dëme të mëdha materiale, ndërsa aktualisht ndërtesa vijon të jetë e mbuluar nga tymi.
Autoritetet po hetojnë më tej për të përcaktuar me saktësi shkaqet e zjarrit, ndërsa fatmirësisht nuk raportohet për persona të lënduar.