Komandanti i Gardës së Republikës, Ermal Onuzi, ka dhënë dorëheqjen nga detyra, vetëm 9 muaj pas emërimit të tij më 10 shtator 2024.
Lajmi konfirmohet nga burime zyrtare, sipas të cilave Onuzi i ka paraqitur dorëheqjen Ministrit të Brendshëm, Ervin Hoxha.
Kush është Ermal Onuzi?
Ermal Onuzi është një profil me karrierë të spikatur në fushën ushtarake dhe të inteligjencës. Ai ka kryer studimet e larta ushtarake në Akademinë Ushtarake të Modenas dhe në Shkollën e Specializimit të Oficerëve në Torino, ndërsa mban gjithashtu diplomë Master Shkencor në Shkenca Strategjike nga Universiteti i Torinos.
Pas kthimit në Shqipëri, Onuzi ka shërbyer nga viti 2003 deri në 2005 si komandant toge në Batalionin e Dytë të Këmbësorisë, pjesë e Brigadës së Reagimit të Shpejtë. Në vitin 2005, u emërua në Shërbimin Informativ Ushtarak (SHIU) në Ministrinë e Mbrojtjes, ndërsa katër vite më vonë u transferua në Shërbimin Informativ të Shtetit (SHISH), ku ka mbajtur funksione të ndryshme deri në emërimin e tij në krye të Gardës.
Ende nuk ka një reagim zyrtar nga Ministria e Brendshme për dorëheqjen dhe arsyet e saj, ndërsa pritet që në ditët në vijim të bëhet publik edhe emri i komandantit të ri të Gardës së Republikës.