Një zjarr masiv ka përfshirë pyllin me pisha pranë plazhit të Darëzezës, duke shkaktuar panik në zonën turistike. Flakët, të përhapura me shpejtësi nga era e fortë, janë afruar rrezikshëm pranë disa lokaleve buzë detit, duke rrezikuar pronën dhe sigurinë publike.
Katër mjete zjarrfikëse ndodhen në terren dhe po luftojnë me flakët për të shmangur një katastrofë më të madhe. Bashkë me zjarrfikësit, edhe banorët janë mobilizuar për të ndihmuar në kontrollimin e zjarrit.
Autoritetet lokale po ndjekin situatën në kohë reale, ndërsa vijon puna për izolimin e vatrës dhe parandalimin e përhapjes drejt zonave të banuara dhe turistike. Deri tani nuk raportohet për të lënduar, por dëmet materiale janë ende të paqarta.