Autoritetet turke të aviacionit kanë vendosur të gjobisin pasagjerët që ngrihen nga vendet e tyre para se të fiket sinjali i rripit të sigurimit, pas uljes së avionit.
Vendimi vjen pas një rritjeje të incidenteve dhe ankesave të shumta për pasagjerë që ngrihen dhe marrin bagazhet përpara ndalimit të plotë të mjetit fluturues. Sipas mediave ndërkombëtare, gjobat do të jenë rreth 70 dollarë, edhe pse shuma nuk është specifikuar në udhëzimet zyrtare.
Sipas rregullores së re, kompanitë ajrore do të duhet të paralajmërojnë udhëtarët gjatë fluturimit dhe të raportojnë ata që nuk respektojnë urdhrat. Turkish Airlines, transportuesi kombëtar, ka përditësuar tashmë njoftimet në bord.
Pasagjerët që shkelin rregullin do të identifikohen përmes një raporti të veçantë dhe do të përballen me gjoba administrative nga Drejtoria e Përgjithshme e Aviacionit Civil.
Turqia, një prej destinacioneve më të vizituara në botë, synon të përmirësojë sigurinë dhe disiplinën në udhëtimet ajrore me këtë masë të re.