Ministri i Mbrojtjes, Pirro Vengu, ka deklaruar se Shqipëria do të nisë prodhimin e municioneve vendase brenda vitit 2026, si pjesë e një nisme të gjerë për rivitalizimin e industrisë ushtarake. Sipas tij, prodhimi i parë do të nisë në shtator të këtij viti, duke përfshirë edhe pajisje personale dhe uniforma.
Në një intervistë televizive, Vengu njoftoi gjithashtu blerjen e dy avionëve për përdorim të dyfishtë civil-ushtarak, me funksion të veçantë për shuarjen e zjarreve.
Ai konfirmoi edhe kthimin e rezervistëve në forcat aktive, një vendim i miratuar së fundmi nga qeveria. Deri tani janë dorëzuar 220 kërkesa për rikthim, një sinjal për tërheqjen në rritje ndaj karrierës ushtarake.
Vengu theksoi rritjen e interesit për rekrutime, me mbi 470 rekrutë të rinj në vitin 2025 dhe një ulje me 64% të largimeve nga Forcat e Armatosura. Ai nënvizoi gjithashtu faktin se buxheti për mbrojtjen mbetet mbi 2% të PBB-së për të dytin vit radhazi, në përputhje me angazhimet e Shqipërisë në NATO.
Në kuadër të nismës për zhvillimin e industrisë ushtarake, janë ngritur institucione të reja si kompania shtetërore KAYO dhe Agjencia e Industrisë së Mbrojtjes. Deri tani janë marrë 25 shprehje interesi nga kompani ndërkombëtare, ndërsa po zhvillohen 6 negociata konkrete për prodhimin e armatimit, municioneve, mjeteve të blinduara dhe artikujve ushtarakë në zona si Rubiku dhe Poliçani.