Një ngjarje prekëse është shënuar në maternitetin “Koço Gliozheni”, ku ka ardhur në jetë fëmija i dytë i lindur përmes procedurës së fertilizimit in vitro (FIV), falë shërbimit të ofruar pa pagesë nga shteti.
Bebushi, i quajtur Bekim, lindi pas 20 vitesh pritjeje nga prindërit e tij, të cilët më herët kishin provuar pa sukses edhe në klinika private. Ky sukses është rezultat i programit të mbështetjes së fertilitetit që ofrohet për herë të parë në sistemin shëndetësor publik.
Kryeministri Edi Rama uroi familjen përmes një postimi në rrjetet sociale, duke theksuar se mbështetja e qeverisë për familjet e reja është e pandërprerë. Ai kujtoi gjithashtu edhe bonuset financiare që jepen për çdo lindje: 40 mijë lekë për fëmijën e parë, 80 mijë për të dytin dhe 120 mijë lekë për fëmijën e tretë e në vijim.
“Jetë të gjatë bebit Bekim, që, ashtu siç ka emrin, erdhi si një bekim përmes procedurës in vitro në maternitetin “Koço Gliozheni”, që ofrohet falas
*Mbështetja e qeverisë nuk ndalet asnjë moment për familjet e reja që gëzohen me fëmijë
40,000 lekë për fëmijën e parë
80,000 lekë për fëmijën e dytë
120,000 lekë për fëmijën e tretë e në vijim “, shkruan Rama
Nëna e lumtur, Lumturia, falënderoi stafin mjekësor për përkushtimin dhe realizimin e ëndrrës së saj pas dy dekadash përpjekjesh. Mjekët theksuan rëndësinë e shërbimit të ri që tashmë është në dispozicion për të gjitha çiftet që përballen me vështirësi për të pasur fëmijë.
Qendra e Teknikave të Riprodhimit Mjekësor të Asistuar në “Koço Gliozheni” është tashmë një realitet që i jep shpresë shumë familjeve shqiptare.