Një fluturim i kompanisë ajrore norvegjeze Norwegian që po operonte në itinerarin Tiranë–Oslo u detyrua të bënte një ulje emergjente në aeroportin e Splitit, Kroaci, pas një problemi teknik serioz.
Sipas raportimeve të mediave lokale dhe faqes Skyweb.al, gjatë fluturimit u konstatua një krisje në xhamin e kabinës së pilotit, shoqëruar edhe me rënie të presionit në kabinë, çka detyroi ekuipazhin të ndryshonte kurs dhe të kërkonte ulje urgjente në Split.
Të gjitha shërbimet emergjente ishin në gatishmëri në pistë në pritje të avionit. Fatmirësisht, nuk raportohet për të lënduar, ndërsa pasagjerët janë evakuuar në mënyrë të sigurt.
Ky incident vjen vetëm pak orë pasi i njëjti avion kishte pasur një tjetër devijim gjatë fluturimit nga Oslo drejt Tiranës (DY1934), ku u ul në Berlin për arsye ende të paqarta zyrtarisht.
Autoritetet kompetente kanë nisur hetimet për të zbardhur shkaqet teknike dhe për të shqyrtuar zbatimin e procedurave të sigurisë nga kompania ajrore.