Policia greke ka ndërmarrë një operacion të befasishëm në burgun famëkeq të Koridhalos, ku janë ushtruar kontrolle në qelitë e disa të dënuarve shqiptarë. Sipas raportimeve nga vendi i ngjarjes, kontrollet janë përqendruar në krahun e pestë të burgut, ku ndodhen disa prej të dënuarve më problematikë, përfshirë edhe Klod Cara, i njohur me emrin tjetër Klodian Lekocaj, një emër ky i lakuar shpesh nga autoritetet greke si figura qendrore e “mafies së burgjeve”.
Çfarë u gjet në kontroll?
Gjatë kontrolleve të zhvilluara nga Departamenti për Luftën kundër Krimeve me Zhvatje, oficerët e policisë sekuestruan:
2 telefona celularë
2 thika të improvizuara
0.4 gramë kokainë
Katër të burgosur u proceduan penalisht, prej të cilëve dy u arrestuan në flagrancë për shkelje të ligjeve për armët dhe narkotikët.
Kush është Klodian Lekocaj?
I njohur edhe si Cara, Luli, apo Ilia, 48-vjeçari shqiptar është një ndër figurat më të përfolura të botës së krimit në Greqi. Media greke dhe raportet e policisë e cilësojnë si një organizator dhe urdhërues vrasjesh me pagesë, zhvatjesh dhe tentativash arratisjeje brenda dhe jashtë burgjeve greke. Vetë Lekocaj mohon përfshirjen në këto aktivitete, duke pretenduar se është “i pafajshëm” dhe “i përdorur”.
Por dosja e tij penale është e gjatë:
1997: Arrestuar për vjedhje
2003: Arratisje nga burgu i Volosit
2005-2006: Plagosje me armë zjarri dhe thikë në Athinë
2013: Arrestuar për trafik droge; u arratis sërish në 2014 nga burgu i Korfuzit
2014: I përfshirë në vrasje dhe atentate në bashkëpunim me Arbër Bakon dhe të tjerë
2019: Akuzohet për porositjen e një vrasjeje me pagesë ndaj një pakistanezi
2023: Gjobvënie ndaj një biznesmeni grek (100,000 euro)
2024: Akuzuar për atentat ndaj shqiptarëve Kristjanis Stefa dhe Florian Bajraktari
2025: Marrë peng gardianë për të lëvizur në sektor tjetër të burgut, me dyshime për vrasje me pagesë
Një figurë kyçe në botën e nëndheshme
Emri i Lekocajt është lidhur vazhdimisht me grupe kriminale shqiptare dhe greke. Ai është përmendur në përgjime dhe dëshmi si ndërmjetësues për vrasës me pagesë dhe organizator i atentateve të bujshme, përfshirë vrasjen e avokatit grek Mixalis Zafiropoulos dhe atentatet ndaj të burgosurve Arbër Bako dhe Bardhyl Tusha.
Gjithashtu, ai ka rezultuar i lidhur me persona tashmë të vrarë si Elvis Bogdani dhe Ari Papa, ndërkohë që shoqëria e tij me emra të tjerë të botës së krimit, si Dhimo Meci, e bën figurën e tij të një rëndësie të veçantë për autoritetet hetimore.