Kryeministri Edi Rama e cilësoi procesin e anëtarësimit në Bashkimin Europian si “një mundësi historike”, gjatë një interviste për gazetarin austriak Christian Wehrschütz në televizionin Kleine Zeitung.
I pyetur nëse Shqipëria do të arrijë të përmbyllë negociatat deri në vitin 2027, Rama shprehu optimizëm dhe theksoi përdorimin e inteligjencës artificiale si një mjet për të përshpejtuar procesin e përafrimit me ligjet e BE-së.
“Dy vjet e gjysmë është kohë shumë e shkurtër, por ne kemi punuar shumë dhe jemi përgatitur mirë. AI na ndihmon të përshtatim më shpejt acquis communautaire në sistemin tonë ligjor”, deklaroi Rama.
Lidhur me skepticizmin e disa vendeve anëtare për zgjerimin e BE-së, Rama theksoi se qasja më e mirë është përqendrimi te angazhimet konkrete:
“Nuk duhet të mendojmë për ndeshjen e radhës, por për atë që po luajmë. Pasi të përfundojmë negociatat, do t’u takojë parlamenteve të vendeve anëtare të ratifikojnë marrëveshjen,” shtoi ai.
I pyetur për gjendjen në rajon, Rama u shpreh se “situata në Ballkan nuk ka qenë kurrë më e mirë”, dhe se procesi i afrimit me BE-në po ndihmon në zgjidhjen e shumë problemeve.
Në fund, kur gazetari kërkoi të përmendte tri prioritetet kryesore për katër vitet e ardhshme, Rama u përgjigj shkurt:
“BE, BE, BE.”