Kryeministri Edi Rama së fundmi i ka dërguar një mesazh kandidatëve të PS të cilë ankimuan në Komisionin Qendror të Zgjedhjeve rezultatet e 11 majit.
Në mesazhin e tij, Rama shkruan se kandidatët duhet të mos vijojnë me ankimimet, duke shtuar se të gjithë bashkë janë një skuadër.
Më tej ai shton se ka zero shanse që votat preferenciale të jenë devijuar.
”Kam marrë njoftim me trishtim për disa iniciativa individuale, për të kërkuar filmime, rinumërime e ku di unë çfarë tjetër për votën preferenciale! Natyrisht që s’mund të ndaloj askënd të veprojë me kokën e vet, por, duke qenë se këtu në këtë dritare jemi ende një skuadër – dhe unë dua që kështu të mbetemi – do të këshilloja që të mos i hyhet asaj rruge. Sepse, së pari, humbja e një gare s’duhet të bëhet shkak për të humbur edhe fytyrën, kur në fakt nuk ka asnjë shans, zero, që me gjithë ata sy mbi ekrane, të ketë devijime vote në përmasa që do ta mbushnin hendekun e kujtdoqoftë me ata që kanë dalë fitues – jo me 10 a 20, por me shumë më tepër vota diferencë nga pasuesit në klasifikim. Së dyti, kjo do të thotë të hidhet hije mbi njerëzit tanë, që kanë qëndruar pafundësisht nëpër tryeza numërimi, e që nuk e meritojnë kurrkund një hije të tillë dyshimi për kontributin e tyre të madh. E së fundi, përfytyrojeni vetë se sa keq do të ndjehet kushdo që do t’i hyjë kësaj rruge, duke ushqyer qenerinë mediatike, kur në fund, mali i mbarsur mund të mos pjellë as një mi,“-shkruan Rama në mesazhin e tij.
Kujtojmë se një subject politik dhe 11 kandidatë së fundmi kanë kërkuar pamjet filmike në KQZ me pretendimin se iu vodhën votat.
LEXO EDHE: