Një diamant i rrallë blu, i quajtur “Blu Mesdhetar”, me peshë 10,03 karatë, është shitur për 19.2 milionë euro në një ankand të zhvilluar nga shtëpia e njohur e ankandeve Sotheby’s në Gjenevë.
Megjithëse vlera e tij ishte parashikuar të arrinte në rreth 20 milionë dollarë (afërsisht 17.8 milionë euro), shitja nuk rezultoi aq mbresëlënëse sa pritej, sipas Tobias Kormind, drejtor i kompanisë 77 Diamonds. Ai vuri në dukje se pasiguritë globale, përfshirë tensionet tregtare SHBA-Kinë, mund të kenë ndikuar në uljen e entuziazmit të ofertuesve.
Gurin e çmuar e fitoi një koleksionist amerikan pas një gare mes dy ofertuesve, e cila nisi nga 9 milionë franga zvicerane (rreth 9.6 milionë euro) dhe zgjati afro tre minuta.
Quig Bruning, shefi i departamentit të bizhuterive të Sotheby’s për Amerikën e Veriut, Evropën dhe Lindjen e Mesme, e cilësoi këtë diamant si “gurin kryesor të sezonit” dhe një nga më të rrallët e llojit të tij që është shitur ndonjëherë.
Diamanti është zbuluar së fundmi në minierën legjendare Cullinan në Afrikën e Jugut dhe vlerësohet si një ndër diamantët më të çmuar në botë për nga ngjyra dhe pastërtia.