Kryeministri Edi Rama ka vlerësuar lart zhvillimin në Tiranë të Samitit të Komunitetit Politik Europian, duke e cilësuar si një dëshmi të përkushtimit të Shqipërisë dhe rajonit ndaj vlerave europiane.
Në një deklaratë për mediat pas përfundimit të samitit, Rama tha se takimi ishte një moment i rëndësishëm për të rikonfirmuar unitetin e kontinentit dhe për të forcuar vlerat e përbashkëta demokratike dhe sociale.
“Pata kënaqësinë të konstatoj një përkushtim të ripërtërirë për të mbrojtur qytetarët tanë dhe të ardhmen e Europës. Diskutuam mbi investimet në inovacion dhe përfshirjen e vendeve që ende nuk janë pjesë e BE-së,” u shpreh Rama.
Ai theksoi se dita ishte e frytshme dhe se u vendos ngritja e një skuadre bashkërenduese të Komunitetit Politik Europian, e cila do të funksionojë pranë zyrës së Presidentit të Këshillit Europian.