Nga zgjedhjet e 11 majit në qarkun e Kukësit, janë ndarë tre mandate parlamentare, ku Partia Demokratike-ASHM ka siguruar dy vende dhe Partia Socialiste një.
Sipas rezultateve paraprake, nga koalicioni PD-ASHM, kandidati Flamur Hoxha siguron automatikisht një mandat, pasi është pjesë e listës së mbyllur. Ndërkohë, mandati i dytë i PD-së pritet t’i shkojë deputetit aktual Isuf Çelaj, falë numrit të lartë të votave preferenciale.
Çelaj kryeson ndjeshëm në garën brenda listës së hapur me 6,588 vota, duke lënë pas Shkëlqim Shehun me 4,072 vota dhe Elvira Pekën me 2,363 vota.
Nga ana tjetër, Partia Socialiste arrin të sigurojë një mandat në Kukës, i cili i takon Eduard Shalsit – kandidat i listës së mbyllur dhe drejtues politik i qarkut.
Këto rezultate konfirmojnë ndikimin në rritje të votës preferenciale në përcaktimin e deputetëve, veçanërisht në qarqe të vogla si Kukësi, ku çdo votë ka peshë vendimtare.