Pas rihapjes së dosjes së 21 janarit, gjatë ditës së sotshme është paraqitur në SPAK ish-komandanti i Gardës, Ndrea Prendi.
Rikujtojmë që Rajmonda Nika, gruaja e Aleks Nikës, u paraqit ditën e djeshme në ambientet e prokurorisë.
Ajo ishte e shoqëruar nga xhaxhai i Aleks Nikës , Mark Nika dhe të dy dëshmuan në lidhje me dosjen e 21 janarit.
Rajmonda Nika fitoi betejën në Strasburg pasi Gjykata Ndërkombëtare e konsideroi si vrasje shtetërore dhe u shpreh për mungesën e hetimeve në Shqipëri.
Prokuroria e Posaçme më datë 16 korrik regjistroi procedimin penal mbi dosjen e 21 janarit, për vrasjen e Aleks Nikës dhe plagosjen e Artes Dybeli, Ilia Qesko dhe Ilia Papa.
SPAK regjistroi procedimin penal për “vrasje në rrethana të tjera cilësuese” e kryer në bashkëpunim, “shpërdorim detyre” dhe “Kryerja e veprimeve që pengojnë zbulimin e së vërtetës”.