Ermela Muhametaj, 27 vjeç, nënë e një djali 8-vjeçar, u gjet e pajetë mbrëmjen e 28 prillit në qytezën Larino të Italisë. Fillimisht dyshohej për akt të vetëshkaktuar, por hetimet dhe mesazhi i fundit kanë zbuluar elementë të rinj që ngrenë dyshime për ndikim nga persona të tjerë.
Të njëjtën ditë, në mëngjes, Ermela kishte kontaktuar avokatin e saj për të caktuar një takim mbi procedurat e divorcit nga bashkëshorti 51-vjeçar me të cilin jetonte e ndarë fizikisht prej disa muajsh. “A mund të takohemi në studio sot?”, ishte mesazhi që ajo i kishte dërguar avokatit.
Sipas mediave italiane: “Hipoteza fillestare është ajo e vetëvrasjes, por në fshat dyshimet dhe pikëpyetjet po rriten: askush nuk beson se një nënë kaq e lidhur me të birin mund të ketë vendosur ta lërë atë.” Prokuroria lokale po heton pistën e nxitjes për të kryer aktin, ndërsa priten rezultatet e autopsisë dhe zbërthimi i telefonit të saj për të kuptuar më shumë rreth ngjarjes.