Në një kohë kur shitjet globale të “Tesla”-s kanë pësuar rënie gjatë tremujorit të parë të vitit 2025, kompania po përjeton rritje të kërkesës në tregun ukrainas, veçanërisht për modelet e përdorura.
Sipas Shoqatës së Prodhuesve të Automjeteve të Ukrainës, muajt shkurt dhe mars kanë shënuar një rritje të ndjeshme të interesit për automjetet elektrike, me “Tesla”-n që kryeson listën e makinave të përdorura elektrike më të shitura.
Kjo prirje e re shpjegohet kryesisht me çmimet në rënie të automjeteve “Tesla”, për shkak të konkurrencës së shtuar nga prodhuesit kinezë të automjeteve elektrike, të cilët ofrojnë alternativa me kosto më të ulët.
“Është një hap i madh nga një ‘Skoda Superb’, por pikërisht këtë doja,” – u shpreh Anatoliy Trepak, një shofer taksie në Kiev, i cili së fundmi bleu një “Tesla” të përdorur për vetëm 18 mijë dollarë.
Ndërkohë, çmimet e mëparshme për të njëjtat modele kapnin vlerën e 40 mijë dollarëve, çka tregon një rënim dramatik të barrierës financiare për hyrjen në këtë treg.
“Pengesa për të hyrë në treg është ulur dhe më shumë njerëz tani mund ta përballojnë,” – tha Bohdan, shitës makinash në një autosallon në Kiev.
Ndërsa në tregje si SHBA-ja dhe Evropa “Tesla”-t janë shënjestruar me vandalizime, shpesh si reagim ndaj qëndrimeve të pronarit Elon Musk në politikën amerikane, në Ukrainë dominon një narrativë më pragmatike – e fokusuar tek performanca dhe përballueshmëria.
Në autosallonin e Kievit, blerësit dhe shitësit tregojnë edhe anën humoristike të kësaj situate. Disa pronarë kanë vendosur stickers me ironi politike, si p.sh.:
“E bleva këtë ‘Tesla’ para se Eloni të çmendej.”