Vendimi për çështjen gjyqësore që lidhet me dosjen “Partizani” në Gjykatën e Posaçme kundër Korrupsionit dhe Krimit të Organizuar (GJKKO) është shtyrë për nesër, në orën 13:00.
Bëhet fjalë për procesin që lidhet me privatizimin e ish-kompleksit sportiv të klubit “Partizani”, një rast që ka tërhequr vëmendjen e opinionit publik për shkak të dyshimeve për korrupsion dhe shkelje të ligjit gjatë procedurave të privatizimit.
Në këtë çështje janë të akuzuar ish-kryeministri Sali Berisha dhe dhëndri i tij, Jamarbër Malltezi, të cilët përballen me akuza të rënda në lidhje me përfshirjen e tyre në procesin e diskutueshëm të privatizimit.
Avokati Genc Gjokutaj në deklaratën për mediat u shpreh se kanë kërkuar kohë për konsultim ndaj vendimmarrjes.
“Ka rrëzuar kërkesat tona për pavlefshmërinë për ekspertët. Vendimmarrja rrëzoi kërkesat që kemi bërë në seancat paraprake. Ne kërkuam një kohë të shpejtë për t’u konsultuar për këtë vendimmarrje të paligjshme. Nesër do ta merrim vesh se gjykata kur do ta japë vendimin në lidhje me dërgimin ose jo të çëshjtes në gjykatë, me themel. Jemi të pasqaruar sepse jam i paqartë për këtë vendim gjyqësor. Unë nuk mund të konsumoj kërkimet e mundshme që mund të bëj, por pasi ta konsultojmë me personat e mandatuar për këtë punë. Kërkesat i kemi bazuar në kodin e procedurës penale”, tha avokati Gjokutaj.