Andrew Tate, influencuesi i njohur britaniko-amerikan, vazhdon të jetë një figurë mjaft e përfolur në mediat ndërkombëtare, jo vetëm për jetën e tij luksoze por edhe për çështjet ligjore që e ndjekin prej vitesh.
Ai dhe vëllai i tij janë të akuzuar për trafikim njerëzor, shfrytëzim seksual dhe përfshirje në një organizatë kriminale. Arrestimi i tyre në Rumani në vitin 2022 ngjalli bujë të madhe, pasi autoritetet rumune pretenduan se kishin ndërtuar një rrjet për shfrytëzimin e grave në industrinë e pornografisë.
Përveç akuzave ligjore, Tate është kritikuar shpesh edhe për deklaratat e tij provokuese lidhur me gratë dhe marrëdhëniet, çka e ka bërë një nga personazhet më polarizues në rrjetet sociale.
Së fundmi, ai ka tërhequr vëmendjen me një tjetër episod të pazakontë: një Tesla Cybertruck me targa shqiptare është parkuar në pronën e tij, e regjistruar në emrin e vetë Tate. Influencuesi u shpreh i befasuar, duke deklaruar se nuk e ka blerë vetë automjetin dhe se nuk është adhurues i makinave elektrike.
“Unë nuk e kam blerë. Nuk më pëlqejnë makinat elektrike. Nuk e di kush e ka sjellë, edhe pse është në emrin tim,” tha ai.
Ai shtoi me habi se dhurata mund të ketë ardhur nga “djemtë shqiptarë të Londrës”, duke nënvizuar se makina kishte kushtuar shumë dhe se në Shqipëri “gjithçka është legale për para”.
Çmimi i një Tesla Cybertruck varion nga 80 mijë deri në 100 mijë dollarë, në varësi të konfigurimit.
