Një aksident tragjik me helikopter në Nju Jork i ka marrë jetën pesë shtetasve spanjollë—një çift i martuar dhe tre fëmijët e tyre—të cilët po kalonin pushime në qytet. Familja kishte rezervuar një fluturim panoramik mbi Manhattan-in me kompaninë New York Helicopter Tours, kur ndodhi tragjedia mbi lumin Hudson. Edhe piloti i helikopterit humbi jetën në këtë aksident.
Ndër viktimat ishte Agustín Escobar, drejtues i njohur dhe CEO Global për Infrastrukturën Hekurudhore në Siemens Mobility në Berlin, si dhe ish-president i Siemens në Spanjë. Bashkëshortja e tij, Merce Camprubi Montal, ishte Drejtoreshë Globale për Komercializimin në Siemens Energy. Gjithashtu humbën jetën edhe tre fëmijët e tyre, të moshës 11, 5 dhe 4 vjeç—njëri prej të cilëve, sipas raportimeve, festonte ditëlindjen atë ditë.
Familja jetonte në Barcelonë dhe ishte shumë e njohur në komunitet. Merce Camprubi rridhte nga një familje me lidhje të ngushta me klubin futbollistik FC Barcelona—ajo ishte mbesa dhe stërmbesa e dy ish-presidentëve të klubit, Agustí Montal Galobart (1946–1952) dhe Agustí Montal Costa (1969–1977), ky i fundit i njohur për afrimin e Johan Cruyff te Barça. Ajo ishte gjithashtu motra e Joan Camprubi Montal, një figurë e njohur opozitare ndaj presidentit aktual të klubit, Joan Laporta.
Autoritetet po vazhdojnë hetimet për të zbardhur shkaqet e aksidentit. Sipas të dhënave të radarëve të fluturimit, helikopteri kishte qenë në ajër për rreth 15 minuta dhe kishte përshkuar afërsisht 6 kilometra. Ai ishte nisur nga heliporti në pjesën jugore të Manhattan-it, kishte ndjekur një rrugë drejt jugut, më pas në veri deri te Ura George Washington, e më pas ishte kthyer sërish në jug përgjatë bregut të Nju Xhersit, përpara se të humbiste kontrollin pranë Hoboken-it.
Ekipet e emergjencës nga NYPD, FDNY dhe Nju Xhersi reaguan menjëherë. Zhytësit nxorën viktimat nga uji, në një ditë me temperatura mes 0 dhe 5 gradë Celsius. Shefja e policisë së Nju Jorkut, Jessica Tisch, konfirmoi se katër trupa u gjetën në vendngjarje, ndërsa dy pasagjerë u nxorën gjallë, por fatkeqësisht ndërruan jetë në spital.
Pamjet nga mediat dhe raportet fillestare sugjerojnë se helikopteri mund të ketë humbur tehët e rotorit në ajër, përpara se të rrëzohej në lumë. Pasi ra në Hudson, helikopteri u përmbys, me pjesën e poshtme të trupit që qëndroi mbi ujë, ndërsa kabina u fundos.
Vetëm pak minuta para tragjedisë, Agustín dhe Merce kishin pozuar të lumtur me fëmijët për një fotografi të bërë nga New York Helicopter Tours. Ajo që duhej të ishte një përvojë e paharrueshme, përfundoi në një tragjedi të rëndë. CEO i kompanisë, Michael Roth, u shpreh: “Nuk e di çfarë ndodhi saktësisht. E vetmja gjë që mund të them është se jemi të shkatërruar. Gruaja ime nuk ka reshtur së qari që prej pasdites.”