Policia e Fierit ka nisur kontrollet për gjetjen dhe largimin e luanit, kafshës që u shfaq në një video duke kafshuar një qytetar në qafë, ndonëse ai ishte afruar vullnetarisht. Kafsha e rrezikshme që mbahet si mace shtëpie ndodhet në fshatin Zharrëz të Fierit.
Për shkak të rrezikshmërisë që paraqet kjo kafshë e cila nuk duhet të mbahet në banesë, policia e Fierit ka ngritur një grup të posaçëm pune për të trajtuar rastin, për shkak të natyrës së veçantë që ai paraqet.
Policia po bashkëpunon me autoritetet përkatëse për të marrë masa urgjente që sigurojnë jo vetëm largimin e kafshës nga ambienti i banimit, por edhe ndëshkimin e përgjegjësve sipas ligjit.
Sipas policisë mbajtja e një kafshe të egër dhe të rrezikshme si luani në ambiente shtëpie është jo vetëm e papërgjegjshme, por përbën një kërcënim të drejtpërdrejtë për sigurinë publike.
Banorët e fshatit e dinë mirë historinë e fqinjit të tyre që mban si kafshë shtëpie një luan. Kjo është banesa por sot atje nuk duket luani që duket se është larguar pas bërjes virale të videos e cila ka rënë edhe në dorën e policisë.
Në video, pronari i luanit godet luanin pasi kafshon mikun e tij që kujdeset për ta ushqyer.