Kryeministri Edi Rama në zhvillimin e takimit, përgjatë ditës së sotshme me partnerët ndërkombëtarë e drejtuesit e shkollave profesionale në vend u ndal te fusha e turizmit.
Rama tha se baza për të hedhur një hap drejt turizmit të mirë, është dualizimi i arsimit profesional.
“Përtej paragjykimeve dhe keqinformimit që pengon njerëz që nga vendi ynë kanë shkuar në Greqi që punojnë në sektorin e turizmit atje, e po të kthehen e të angazhohen këtu, në fund të muajit do kenë një bilanc të ardhurash më pozitiv. Kjo sepse do të jenë pranë shtëpisë së tyre, do të kenë shpenzime modeste transporti e taksa më të ulëta. Solla si shembull turizmin por vlen për të gjithë fushat. Arsimi profesional ka bërë hapa të rëndësishme para, por sot është në nevojën për të hedhur një hap shumë të madh para, dualizimi i arsimit profesional duke spostuar në fushën ku zhvillohet ekonomia, në mjedisin sipërmarrës, ditët e shkollës”, shprehet kryeministri.
Rama nënvizoi se të rinjtë dhe të rejat duhet të kryejnë shkollën që lidhet me këtë fushë të jetës, në mënyrë që ata të mos lejojnë të trajtohen si shërbëtorë në mjediset e punës por të përfitojnë trajtimin maksimum të kujdesit e të ndalohen abuzimet kundrejt tyre .