TIRANË– Shteti kroat ka njoftuar më herët planet për të vazhduar ndërtimin e autostradës nga Spliti në Dubrovnik, plane të cilat janë të njohura për Podgoricën zyrtare.
Megjithatë deri më tani nuk është rënë ende dakord për pikën e kontaktit.
Pasi u njoftua se Kroacia do të ndërtojë autostradën nga Spliti në Dubrovnik, lind pyetja: A do të lidhet kjo rrugë me të ashtuquajturin Korridori Adriatiko-Jonian në vendet fqinje.
Pra kjo çështje është shumë me rëndësi edhe për Malin e Zi.
Në Podgoricë flitet se janë informuar për idenë e Zagrebit, por nuk zbulojnë se ku do të jetë pika e lidhjes së autostradës kroate me Malin e Zi, që është me rëndësi edhe për të gjithë ata që udhëtojnë nga Perëndimi për në vendet e tjera. Mali i Zi po përgatitet të ndërtojë pjesën e dytë të autostradës Bar-Boljare, përgjatë bregdetit malazez si dhe një autostradë për në Shqipëri.
Pavarësisht se Podgorica zyrtare është njoftuar me planet e Kroacisë për të vazhduar ndërtimin e autostradës nga Spliti në Dubrovnik, akoma nuk dihet ku do të lidhet kjo rrugë me ato në Malin e Zi.
“Aktivitetet janë duke u zhvilluar për të harmonizuar pikën ndërlidhëse me Kroacinë. Ne po përgatisim një projekt për një rrugë me shpejtësi të madhe kalimi përmes Gjirit të Kotorrit, e cila do të ndërlidhet me Kroacinë.”-ka njoftuar kompania shtetërore malazeze Monteput, duke shtuar se po përgatisin edhe dokumentacionin për një autostradë deri në kufirin me Shqipërinë. Pikat ndërlidhëse të autostradës do të koordinohen me Zagrebin dhe Tiranën./Radar.al