MALDIVE- Trupat e dy zhytësve të fundit italianë që vdiqën në një shpellë nënujore në Maldive janë gjetur këtë të mërkurë të 20 Majit. Bazuar në atë që raportojnë autoritetet dy zhytësit e fundit janë nxjerrë nga shpella dhe janë rikthyer në sipërfaqe
Pesë italianët, zhytës me përvojë, po eksploronin të enjten një shpellë nënujore në atolin Vaavu.
Një trup u nxor po atë ditë dhe dy të tjerë u gjetën dje, të martën, në një shpellë 60 metra të thellë.
Një zhytës nga Forca Kombëtare e Mbrojtjes së Maldiveve (MNDF), i cili po merrte pjesë në operacion, vdiq të shtunën nga sëmundja e dekompresionit.
Gjithashtu Italia nisi një operacion ndërkombëtar shpëtimi pasi vdekja e zhytësit të MNDF-së i detyroi autoritetet lokale të pezullonin kërkimet.
Pesë viktimat italiane të këtij aksidenti zhytjeje, më i rëndi që ka ndodhur ndonjëherë në këtë destinacion turistik në Oqeanin Indian, janë një profesoreshë e njohur e biologjisë detare, Monica Montefalcone, vajza e saj dhe dy studiues të rinj, sipas Universitetit të Xhenovës, ku të katër kanë studiuar ose punuar. Viktima e pestë është instruktori i tyre i zhytjes.
Presigjiozja italiane ‘Corriere della Sera’ raportoi dje se sipas universitetit, “aktiviteti i zhytjes gjatë të cilit ndodhi aksidenti nuk ishte pjesë e aktiviteteve të organizuara nga misioni shkencor, por ishte i një natyre private”.
Universiteti sqaroi se kërkesat drejtuar autoriteteve maldiviane “ishin bërë padyshim jashtë kontekstit të misionit të autorizuar nga universiteti”.
Maldivet nuk lejojnë turistët të zhyten në thellësi më të mëdha se 30 metra.
Në pritje të rezultateve të hetimit, autoritetet kanë pezulluar licencën e operimit të anijes nga e cila pesë italianët filluan zhytjen e tyre.
Maldivet, një vend i përbërë nga 1,192 ishuj të vegjël koralesh të shpërndarë në Oqeanin Indian, është një destinacion luksoz pushimesh i popullarizuar për entuziastët e zhytjes. Disa vdekje janë regjistruar vitet e fundit, por aksidentet që lidhen me zhytjen dhe sportet ujore janë relativisht të rralla./Radar.al