Autoriteti Kombëtar i Ushqimit (AKU) ka zbuluar prani të aflatoksinës M1 në disa mostra qumështi të analizuara në Vlorë, një substancë e njohur për efektet e saj kancerogjene dhe rrezikun që paraqet veçanërisht për fëmijët.
Gjatë një fushate monitorimi të zhvilluar nga janari deri në prill 2025, AKU analizoi 26 mostra të qumështit dhe nënprodukteve të tij. Nga këto, 10 mostra — afro 40% — rezultuan me nivele të aflatoksinës M1 mbi normat e lejuara të sigurisë ushqimore.
Pas rezultateve alarmante të konfirmuara në Institutin e Sigurisë Ushqimore dhe Veterinare (ISUV), AKU ndërmori menjëherë kontrolle në pikat e shitjes, duke tërhequr nga tregu të gjitha produktet e identifikuara si të pasigurta.
Aktualisht, po zhvillohen hetime për të zbuluar burimin e ndotjes dhe për të parandaluar raste të ngjashme në të ardhmen. Në këtë kuadër, qytetarët e Vlorës këshillohen të jenë të kujdesshëm në konsumimin e produkteve të bulmetit dhe të ndjekin njoftimet zyrtare të AKU-së për sigurinë ushqimore.