BARCELONË– Sheila Eban, e ëma e talentit të Barcelonës dhe Kombëtares së Spanjës, Lamine Yamal, ka “çuditur” me vendimin që ka marrë për të organizuar një event gala ku fansat mund të paguajnë për të darkuar me të. Vetëm 18 vjeç, Yamal është bërë një nga emrat më të përfolur të futbollit botëror falë paraqitjeve mbresëlënëse, dhe duket se familja e tij po shfrytëzon këtë popullaritet.
“DailyMail” shkruan se platforma Eventbrite ka publikuar njoftimin për një mbrëmje festive të organizuar nga “JEN C Events”, ku Sheila Eban do të jetë e ftuara speciale. “Përgatituni për t’u takuar me Sheila Eban, nënën e Lamine Yamal, njërit prej futbollistëve më të mirë në botë, në festën ekskluzive të Krishtlindjeve”, thuhet në përshkrimin e ngjarjes.
Eventi do të zhvillohet më 7 nëntor në Londër dhe është i hapur vetëm për personat mbi 18 vjeç. Çmimi i biletës standarde është rreth 150 euro dhe përfshin një pije mirëseardhjeje dhe një darkë me tre pjata. Një version i dytë i biletës, që shton edhe një shishe vere, kushton 170 euro. Paketa VIP, e cila ofron pije të pakufizuara dhe mundësinë për t’u fotografuar me Sheila Eban, arrin deri në 360 euro por kjo kategori biletash tashmë është shitur plotësisht. Ky event shihet si një menyrë e re e familjes Yamal për të qenë më pranë fansave, por edhe si shembull i rritjes së tregut të eventeve ekskluzive që lidhen me yjet e sportit./Radar.al