Gjatë festimeve për ndërrimin e viteve, si pasojë e hedhjes së fishekzjarrëve, deri në orën 01:30 të datës 01.01.2026, në rang vendi janë raportuar 20 shtetas të lënduar, fatmirësisht pa rrezik për jetën. Mes tyre është edhe një e mitur 13-vjeçare, e cila ka pësuar gërvishtje në parakrah, dyshohet nga një plumb qorr, në zonën e Vaqarrës.
Sipas të dhënave zyrtare, 16 raste janë regjistruar në Tiranë, 2 në Durrës, ndërsa nga 1 rast në Lezhë, Fushë-Arrëz dhe Korçë.
Në kuadër të masave për sigurinë gjatë natës së ndërrimit të viteve, Drejtori i Përgjithshëm i Policisë së Shtetit, Ilir Proda, së bashku me Drejtorin e DVP Tiranë, zhvilluan një takim me shërbimet e Policisë Rrugore dhe me punonjësit e Sallës së Komandimit të DVP Tiranë.
Gjatë takimit, Drejtori Proda uroi Gëzuar Vitin e Ri për të gjithë punonjësit e Policisë së Shtetit, veçanërisht ata në shërbim, duke i falënderuar për përkushtimin dhe sakrificën në garantimin e rendit dhe sigurisë publike.
Ai theksoi se nuk do të ketë asnjë tolerancë ndaj drejtimit të mjeteve nën efektin e alkoolit, duke nënvizuar se kontrollet policore kanë si qëllim parandalimin e aksidenteve dhe shpëtimin e jetëve. Drejtori i Përgjithshëm kërkoi profesionalizëm, korrektësi, komunikim etik dhe kujdes maksimal gjatë ushtrimit të detyrës.
Në momentin e ndërrimit të viteve, Proda inspektoi Sallën e Komandimit të DVP Tiranë, ku vlerësoi rolin kyç të kësaj strukture në menaxhimin dhe koordinimin e situatave operative, duke theksuar se çdo telefonatë dhe informacion duhet trajtuar me seriozitet maksimal.
Policia e Shtetit bën me dije se shërbimet policore në të gjithë vendin vijojnë të jenë në gatishmëri të plotë, duke monitoruar qarkullimin rrugor, ambientet festive dhe gjithë territorin.