Presidenti i SHBA Donald Trump, ka reaguar për herë të parë pas një telefonate dy-orëshe me presidentin rus Vladimir Putin, duke deklaruar se “Rusia dhe Ukraina do të fillojnë menjëherë negociatat drejt një armëpushimi dhe, më e rëndësishmja, për t’i dhënë fund luftës”.
Në një postim në platformën e tij Truth Social, Trump e përshkroi telefonatën si “shumë të suksesshme”, ndërsa shtoi se është i vendosur të ndërmjetësojë një zgjidhje paqësore për konfliktin.
Nga ana e tij, Putin e quajti bisedën “informative, të hapur dhe shumë të dobishme”, duke shprehur gatishmërinë e Rusisë për të punuar me Kievin në një memorandum për një traktat paqeje. Megjithatë, ai nënvizoi se “shkaqet themelore të konfliktit duhet të eliminohen”, një frazë që tradicionalisht nënkupton kërkesa të rënda si largimi i Zelensky dhe pranimi i kontrollit rus në territoret e aneksuara.
Trump, ndërkohë, pritet të zhvillojë një tjetër telefonatë me presidentin ukrainas Volodymyr Zelensky, për të çuar përpara përpjekjet për ndërmjetësim.
Kjo është ndër nismat më të rëndësishme të ndërmarra nga Trump që prej rikthimit në Shtëpinë e Bardhë, duke e pozicionuar veten si figurë kyçe për paqen në Evropën Lindore.