Ambasada e Shteteve të Bashkuara në Tiranë mirëpriti gjatë kësaj jave Ndihmës Drejtorin e ICITAP në Departamentin e Drejtësisë së SHBA-së, Stephen Fields, në një vizitë zyrtare që zgjati nga 19 deri më 23 maj.
Gjatë qëndrimit në Shqipëri, zyrtari i lartë amerikan zhvilloi takime të rëndësishme me përfaqësues të lartë të shtetit shqiptar, përfshirë të Ngarkuarën me Punë të SHBA-ve në Tiranë, Nancy VanHorn, ministrin e Brendshëm Ervin Hoxha, kreun e SPAK Altin Dumani, si dhe drejtues të institucioneve kyçe të zbatimit të ligjit, si Policia e Shtetit, Agjencia e Mbikëqyrjes Policore dhe Drejtoria e Përgjithshme e Burgjeve.
Në qendër të diskutimeve ishin lufta ndaj karteleve të drogës, krimit të organizuar ndërkombëtar dhe emigracionit të paligjshëm – prioritete strategjike të administratës amerikane.
Gjatë vizitës, SHBA dhuroi gjithashtu pajisje në vlerë prej 340 mijë dollarësh për sistemin penitenciar shqiptar, nëpërmjet programeve ICITAP, INL dhe Byrosë kundër Terrorizmit.
Vizita u mbyll me ndarjen e Çmimit të Ekselencës dhe dhënien e akreditimit të parë ndërkombëtar IADLEST për Akademinë e Sigurisë në Shqipëri – një njohje e rëndësishme për profesionalizmin në fushën e trajnimit të zbatuesve të ligjit.