Federata Shqiptare e Futbollit ka zyrtarizuar rinovimin e kontratës me trajnerin e Kombëtares shqiptare, Sylvio Mendes Campos Júnior (Sylvinho), si dhe me dy zëvendëstrajnerët e tij, Pablo Zabaleta dhe Dorival Guidoni Junior. Vendimi konfirmon vazhdimësinë e projektit teknik që ka sjellë rezultate pozitive dhe historike për futbollin shqiptar.
Sipas FSHF-së, kontrata e re me stafin teknik do të jetë e vlefshme deri në korrik 2026, me objektivin kryesor kualifikimin e Shqipërisë për herë të parë në fazën finale të Kupës së Botës.
Nën drejtimin e Sylvinhos, Kombëtarja ka treguar përmirësim të ndjeshëm në organizim, identitet loje dhe rezultate, duke siguruar për herë të parë pjesëmarrjen në fazën play-off të Botërorit 2026.
Në muajin mars, kuqezinjtë do të luajnë një ndeshje vendimtare në gjysmëfinalen e play-off-it ndaj Polonisë, më 26 mars. Në rast kualifikimi, Shqipëria do të përballet në finalen vendimtare me fituesin e çiftit Ukrainë–Suedi.