Flakë të fuqishme po përpijnë faqen e malit mbi qytetin e Delvinës, duke u afruar rrezikshëm pranë puseve të gazit dhe kondensatit – një zonë strategjike për furnizimin energjetik të Shqipërisë.
Edhe pse këto puse janë të mbrojtura nga një perimetër sigurie i zhveshur nga vegjetacioni, era e fortë dhe temperaturat ekstreme mund të çojnë flakët drejt tyre.
Dhjetëra mjete zjarrfikëse, forca ushtarake dhe një helikopter po luftojnë pa ndërprerje për të ndalur avancimin e zjarrit nga toka dhe ajri.
Zona ku po përhapet zjarri është një nga vendburimet më të rëndësishme të gazit natyror në vend. Puset e Delvinës, të zbuluara në fund të viteve ’80, prodhojnë çdo ditë rreth 8–10 mijë Nm³ gaz, duke e bërë këtë situatë një alarm të lartë jo vetëm për mjedisin, por edhe për sigurinë energjetike të Shqipërisë.