Një zjarr i fuqishëm ka përfshirë mbrëmjen e së dielës një zonë pyjore mes fshatrave Andon Poçi dhe Hundëkuq, në bashkinë e Gjirokastrës, duke mobilizuar menjëherë forcat zjarrfikëse.
Sipas informacioneve paraprake, alarmi është dhënë në orën 21:09, ndërsa në vendngjarje janë dërguar dy automjete të Mbrojtjes nga Zjarri dhe Shpëtimit (MZSH), së bashku me ekipet e emergjencës.
Nga të dhënat në terren rezulton se zjarri ka dy vatra aktive të vendosura në kodra të ndryshme. Terreni i thyer dhe i vështirë ka penguar afrimin e mjeteve zjarrfikëse pranë flakëve, duke e bërë ndërhyrjen më të ndërlikuar.
Për shkak të përmasave të zjarrit, në operacion është angazhuar i gjithë efektivi i MZSH-së, i cili po punon për izolimin dhe shuarjen e flakëve, me qëllim parandalimin e përhapjes së tyre drejt fshatrave Andon Poçi dhe Hundëkuq.
Shkaqet e zjarrit mbeten ende të paqarta, ndërsa autoritetet vijojnë punën për vënien e situatës nën kontroll.