HIMARË- Fredi Beleri ka kërkuar që të pezullohet dekreti i firmosur nga Presidenti, Bajram Begaj për shpalljen e zgjedhje të pjesshme për Bashkinë e Himarës, më 4 gusht.
Vetëm tre ditë më parë, më 5 Korrik 2024, u firmos dekreti, dita kur KQZ deklaroi të pavlefshëm mandatin e kryetarit të zgjedhur të Himarës Fredi Beleri, pas vendimit të formës së prerë të Gjykatës së Apelit e cila e dënoi atë me dy vjet burgim, për korrupsion në zgjedhje.
Teksa më 5 Korrik, Beleri ishte i pranishëm në mbledhje, por dhe mbrojtësit e tij, mbështetën idenë se Komisioni qëndror i Zgjedhjeve nuk mund të shprehej për këtë rast, pa një vendim të Qeverisë që e shkarkonte atë nga detyra. Sikurse deklaroi edhe kreu i KQZ, Ilirjan Celibashi, vendimi mbështetej në të ashtuquajturin Ligj të Dekriminalizimit.
Menjëherë më pas Qeveria kërkoi shpalljen e zgjedhjeve të reja në Himarë, nga presidenti, i cili po ashtu me shpejtesi dekretoi 4 gushtin si datën e zgjedhjeve të pjesshme./Radar.al
