Presidenti i Ukrainës, Volodymyr Zelensky, deklaroi se shërbimet e inteligjencës ushtarake ukrainase kanë prova të forta që Rusia po vazhdon të furnizojë Iranin me informacione të ndjeshme.
Pas një takimi me drejtuesin e inteligjencës ushtarake, Zelensky theksoi se Moska po përdor kapacitetet e saj në fushën e inteligjencës së sinjaleve dhe asaj elektronike, si dhe të dhëna të siguruara përmes bashkëpunimeve me partnerë në Lindjen e Mesme.
Deklaratat e tij u publikuan në platformën X, ndërsa vijnë në një kohë tensionesh të shtuara ndërkombëtare.
Ndërkohë, Kremlini ka mohuar më herët raportimet e medias amerikane Wall Street Journal, të cilat pretendonin se Rusia kishte ndarë me Iranin imazhe satelitore dhe teknologji të avancuar dronësh, duke i cilësuar këto lajme si të pavërteta.