Zbulohet shkaku i magnetizmit të çuditshëm të Hënës – një impakt gjigant mund të ketë “super-ngarkuar” fushën e saj magnetike
Shkencëtarët në MIT kanë hedhur një teori të re për të shpjeguar një nga misteret më të vjetër të Hënës: pse disa prej shkëmbinjve të saj janë jashtëzakonisht të magnetizuar, pavarësisht se Hëna nuk ka një fushë magnetike të fuqishme si Toka.
Sipas studimit të udhëhequr nga shkencëtari planetar Isaac Narrett, ky magnetizëm i pazakontë mund të jetë rezultat i një impakti masiv që ndodhi miliarda vite më parë. Përplasja, e ngjashme me atë që formoi basenin Mare Imbrium, mund të ketë krijuar një re të dendur plazme – grimca të ngarkuara – që amplifikoi përkohësisht fushën magnetike të Hënës për rreth 40 minuta.
Kjo rritje e përkohshme do të kishte ndikuar në mineralet e sipërfaqes, duke bërë që shkëmbinjtë të magnetizoheshin më fort – një efekt i dallueshëm sidomos pranë polit jugor dhe në anën e largët të Hënës.
Teoria sfidon supozimet e mëparshme se ky magnetizëm vinte vetëm nga një “dinamo” në bërthamën e Hënës, dhe sugjeron se kombinimi i një impakti gjigant dhe fushës ekzistuese ka lënë pas këtë gjurmë magnetike.
Kjo hipotezë mund të verifikohet gjatë misioneve të ardhshme në kuadër të programit Artemis të NASA-s, ku astronautët do të eksplorojnë polin jugor të Hënës dhe do të sjellin mostra shkëmbinjsh për analizë.