Incidenti në qendrën sportive ku ishte grumbulluar kombëtarja shqiptare në Gjermani po bëhet gjithnjë e më i qartë me kalimin e ditëve.
Një punonjëse e shërbimit ka denoncuar në polici se është ngacmuar seksualisht nga një pjestar i stafit të kombëtares shqiptare. Personi në fjalë është Orgest Tujani, ndihmës magazinier i Federatës Shqiptare të Futbollit.
Pas denoncimit në polici, autoritetet gjermane po zbatojnë të gjitha procedurat ligjore për të trajtuar çështjen.
Sipas të dhënave paraprake, punonjësja e pastrimit fillimisht kishte marrë Tujanin si futbollist të kombëtares shqiptare dhe ishte dukur se kishte dhënë shenja afeksioni. Megjithatë, kur mësoi të vërtetën, ajo ishte sjellë ftohtë. Megjithatë, punonjësi i FSHF-së vazhdoi të insistonte për të krijuar një lidhje të papëlqyeshme me punonjësen, e cila pastaj dërgoi rastin në policinë e qytetit Unna.
Gazeta gjermane BILD njoftoi se pastruesja e hotelit të shkollës sportive Kaiserau në Kamen ka raportuar ngjarjen në policinë më 23 qershor.
Zëdhënësja e prokurorisë që po heton ngjarjen ka konfirmuar se deri tani nuk është lëshuar urdhër arresti.
“Për ne, kujdesi ndaj punonjëses dhe mbrojtja e të drejtave të saj personale kanë përparësi kryesore”, tha një zëdhënëse e “SportCentrum Kaiserau”. Pas zbulimit të ngjarjes, zv.magazinieri i FSHF-së u pezullua menjëherë nga Federata Shqiptare e Futbollit.