Ylber Ramadani do të vijojë karrierën e tij në Serie A me skuadrën e Lecces. Drejtori teknik i klubit verdhekuq, Pantaleo Corvino, ka bërë një pasqyrë të situatës kontraktuale të lojtarëve, duke konfirmuar se mesfushori i Kombëtares shqiptare do të rinovojë kontratën e tij.
Ramadani ndodhet aktualisht në sezonin e tretë me Leccen dhe ka një kontratë që skadon në qershor të vitit 2026. Corvino theksoi se klubi do të ushtrojë opsionin e rinovimit për lojtarët që janë drejt përfundimit të kontratës, duke përfshirë Ramadanin, Gallo dhe Banda.
“Për të gjitha kontratat që janë drejt skadencës, është një opsion që do ta ushtrojmë në momentin e duhur dhe ky është rasti edhe i Ramadanit,” u shpreh Corvino në konferencë për shtyp.
Ky vendim nënkupton se mesfushori kuqezi do të qëndrojë në Lecce të paktën edhe për një sezon tjetër, deri në vitin 2027. Ndërkohë, drejtuesit e klubit planifikojnë të zhvillojnë bisedime me futbollistin për një rinovim edhe më afatgjatë, gjithmonë me miratimin e trajnerit Eusebio Di Francesco, i cili e konsideron Ramadanin një element kyç dhe shumë të rëndësishëm në organikën e skuadrës.