Presidenti serb Aleksandar Vuçiç ka reaguar ashpër pas vendimit të Sirisë për të njohur pavarësinë e Kosovës, duke e cilësuar këtë zhvillim si të pritshëm dhe të ndikuar drejtpërdrejt nga Turqia.
Gjatë një deklarate për mediat në Samarkand, pas pjesëmarrjes në hapjen e sesionit të 43-të të Konferencës së Përgjithshme të UNESCO-s, Vuçiç tha se “ky veprim mban firmën e dallueshme të Turqisë” dhe se ndryshimi i qasjes së qeverisë së re në Damask është pasojë e ndikimit të Ankarasë.
“Kjo është një maratonë, jo një garë 50 metrash. Fuqitë më të mëdha të botës po përpiqen të na marrin tokën dhe territorin tonë, por ne po ia dalim mbanë mirë,” u shpreh Vuçiç me tone sfiduese.
Njohja e Kosovës nga Siria u njoftua të mërkurën nga Ministria e Jashtme siriane gjatë një takimi në Riad të Arabisë Saudite, duke e shtuar kështu listën e vendeve që e njohin pavarësinë e Prishtinës.