Një konflikt i trashëguar mes dy familjeve për një kanal vaditës ka përfunduar me gjakderdhje në fshatin Kryekuq të Divjakës.
Mbrëmë, rreth mesnatës, 32-vjeçari Besmir Kumria u vra me thikë teksa ishte ulur në një lokal me miqtë e tij. Autori i dyshuar, Xhesion Toromeni, 25 vjeç, pas krimit u largua, por u kap pas disa orësh ndjekjeje intensive nga forcat operacionale të Policisë Fier.
Sipas hetimeve paraprake, ngjarja ka lidhje me konfliktet e vazhdueshme mes dy familjeve për përdorimin e një kanali ujitës në zonë. Toromeni akuzohet për “Vrasje me paramendim” dhe “Mbajtje pa leje të armëve të ftohta”.
Banorët e Kryekuqit janë tronditur nga ngjarja, ndërsa policia dhe prokuroria po vijojnë hetimet për dokumentimin e plotë të kësaj tragjedie.