Prokuroria pranë Gjykatës së Shkallës së Parë Elbasan njofton se ka përfunduar hetimin dhe ka dërguar për gjykim çështjen penale nr. 1469, lidhur me ngjarjen e ndodhur më 2 tetor 2021, ku të pandehur janë:
- Erjon Llapushi, i cili është hetuar në masën e sigurisë “Arrest në burg” dhe akuzohet për veprën penale të “Vrasjes me dashje” sipas nenit 76 të Kodit Penal.
- Luan Dulellari, i cili gjithashtu është hetuar në masën e sigurisë “Arrest në burg” dhe akuzohet për veprat penale të “Moskallëzimit të krimit” sipas nenit 300/1 të Kodit Penal dhe “Përkrahjes së autorit të krimit” sipas nenit 302/1 të Kodit Penal.
Ngjarja ka ndodhur më 2 tetor 2021 në ambientet e subjektit “Rozafa Fish” në Labinot, Elbasan, ku një konflikt midis disa klientëve dhe punonjësit të restorantit, Gazmend Kormaku, përfundoi tragjikisht. Pas një debati, Kormaku u godit me grusht nga autori dhe ndërroi jetë më 7 tetor 2021.
Hetimet për këtë rast janë ndjekur nga Drejtuesi i Prokurorisë, Kreshnik Ajazi.