“Kjo ishte një ngjarje që do të përvëlojë Shkodrën”. Kështu u shpreh gazetarja Klodiana Lala në një studio televizive lidhur me atentatin e 30 tetorit.
Sipas saj, “Hamza Lici ishte duke udhëtuar me Arlind Bushatin, me të cilin ishin lidhur shumë kohët e fundit. Familja Bushati është një familje me tradita, një ndër më të njohurat në Shkodër, që nuk kanë pasur probleme.
VIDEO/ Shikoni pamjet nga vendi ku u vranë dy persona sot në Shkodër
Arlind Bushati ishte i lidhur fillimisht me Astmer Bilalin, më pas ishte hedhur në krahun tjetër, te Licët”, tha gazetarja Lala.
Ajo tha se mund të kenë qenë dy ekzekutorë, që kanë qëlluar me breshëri armësh ndaj automjetit ku ishin Lici dhe Bushati. Lala tha se gjendja shëndetësore e Arlind Bushatit është e rëndë, ai po lufton me jetën.
Lala u shpreh se qëllimi i atentatorëve është që t’i vrisnin të dy, si Hamza Licin ashtu edhe Arlind Bushatin.
NGJARJA
Një masakër ka ndodhur këtë të mërkurë, 30 tetor në Shkodër. Nga raportimet e para u mësua për një të plagosur, më pas bilanci u rëndua dhe nga vendngjarja mësohet se kanë humbur jetën dy persona dhe dy të tjerë janë plagosur.
Fatkeqësisht një nga viktimat është një kalimtare e rastit. Gruaja e pafat, e cila rastisi në momentin e atentatit, ishte duke lëvizur edhe me bashkëshortin e saj me motor.
Bashkëshorti i saj ndodhet i plagosur në spitalin e Shkodrës.
Ata po udhëtonin me motor kur plumbat e kallashnikovit kanë kapur dhe çiftin e bashkëshortëve.
Ndërsa mësohet se i plagosuri tjetër rëndë është Arlind Bushati.
Një nga viktimat është Hamza Lici. Hamzai është vëllai i Ibrahim Licit.