Autoritetet italiane vijojnë hetimet për zbardhjen e vrasjes së 58-vjeçarit shqiptar Fatos Cenaj, i cili u qëllua me armë zjarri më 8 qershor pranë fermës ku punonte në Fontaniva. Pista e hakmarrjes po konsiderohet gjithnjë e më e mundshme, ndërsa prokuroria italiane po kërkon të rindërtojë lëvizjet e viktimës ditët para ngjarjes dhe po analizon me kujdes pamjet filmike nga rruga ku ai kalonte çdo mëngjes për të shkuar në punë.
Hetuesit kanë identifikuar mbi 30 automjete që kaluan në Via Casoni Basse atë mëngjes, dhe po përpiqen të dallojnë ndonjë prani të dyshimtë që nuk lidhet me banorët lokalë. Një automjet i panjohur, që nuk i përket komunitetit të zonës, është aktualisht në qendër të vëmendjes.
Provat e mbledhura sugjerojnë një atentat të mirëmenduar: Cenaj u qëllua me një plumb të vetëm në kokë nga afër, në mënyrë precize. Mungesa e gëzhojës dhe e plumbit në vendin e ngjarjes tregon se mund të jetë përdorur një armë revolver, ose që autori ka marrë qëllimisht gëzhojën për të mos lënë gjurmë – një veprim tipik i një vrasësi me përvojë.
Në ndihmë të hetimeve janë përfshirë ekspertët balistikë të RIS-it nga Parma, të cilët po analizojnë plagën dhe rrobat e viktimës për të përcaktuar distancën e të shtënës dhe llojin e armës. Ndërkohë, karabinierët e Padovës po përdorin dronë dhe detektorë metalesh për të kontrolluar zonën ku ndodhi krimi, ndërsa janë intervistuar mbi 30 dëshmitarë.
Një dëshmitar dëgjoi një të shtënë atë mëngjes, dhe dy persona që po peshkonin gjetën trupin e pajetë të Cenajt pranë mjetit të tij triçikël. Fillimisht u dyshua për një aksident, por autopsia zbuloi dy vrima në kafkë, që konfirmuan vrasjen.
Fatos Cenaj kishte një të kaluar si roje burgu në Shqipëri dhe jetonte prej vitesh në Itali, ku punonte me kuajt në një fermë. Për të thelluar hetimin, autoritetet italiane janë duke bashkëpunuar edhe me policinë shqiptare për të shqyrtuar të kaluarën e viktimës në vendlindje dhe çdo konflikt të mundshëm që mund të lidhet me ngjarjen.
Hetuesit nuk përjashtojnë ende pistën e një gabimi tragjik, por për momentin, provat e disponueshme e bëjnë gjithnjë e më të fortë hipotezën e një ekzekutimi të qëllimshëm.