Kalimi në kufirin greko-shqiptar po shoqërohet me radhë të gjata dhe vonesa të konsiderueshme, sidomos në pikat e Mavromatit dhe Qafë Botës.
Në Mavromat, kolona e automjeteve arrin deri në dy kilometra, ndërsa koha e pritjes për kalim shkon deri në tri orë. Temperaturat e larta po e rëndojnë edhe më shumë situatën për udhëtarët, të cilët presin në diell.
Në Qafë Botë, fluksi është gjithashtu i lartë. Pala shqiptare po operon me tre sportele, ndërsa ajo greke me vetëm dy, duke ngadalësuar ritmin e përpunimit të dokumenteve.
Gjatë 24 orëve të fundit janë përpunuar mbi 7 mijë shtetas dhe më shumë se 2,600 mjete, me hyrje të shumta nga turistë të huaj. Autoritetet kufitare u bëjnë apel udhëtarëve për mirëkuptim dhe i këshillojnë të planifikojnë udhëtimin me kohë, për të shmangur pritjet e gjata.
Radar.al