Kryeministri Edi Rama publikoi sot një fotoalbum me momentet kryesore të javës së tij, duke përfshirë vizita diplomatike, aktivitete ekonomike dhe përkujtimin e vlerave kombëtare.
Në fillim të javës, Rama zhvilloi një vizitë zyrtare në Aman, Jordani, ku u prit me ceremoni nga mbreti Abdullah II bin Al-Hussein. Takimi konfirmoi partneritetin e ngushtë mes Shqipërisë dhe Jordanisë, si dhe bashkëpunimin në nivel rajonal dhe forcimin e marrëdhënieve diplomatike dhe ekonomike.
Gjatë javës, kryeministri mori pjesë edhe në “Tirana Economic Forum”, ku theksoi zhvillimin e vendit:
“Shqipëria po kthehet në një korridor zhvillimi nga veriu në jug. Po ngrihen aeroporte dhe porte të reja, parqet energjetike po zgjerohen, zonat turistike dhe industriale po marrin formë.”
Sipas Ramës, rritja ekonomike e Shqipërisë vjen si rezultat i reformave, jo thjesht sloganeve.
Në vijim, Rama mori pjesë në ceremoninë solemne për 100-vjetorin e Urdhrit të Skënderbeut në Pallatin e Kongreseve, ku u nderuan 24 personalitete me kontribut në fusha të ndryshme. Kryeministri përkujtoi figurën historike të Gjergj Kastriotit Skënderbeut si simbol të unitetit dhe shtetësisë shqiptare.
Po këtë javë, Rama mori pjesë edhe në aktivitetin “30 vjet Prokurime Publike – Shqipëria, lider rajonal në modernizimin e sistemeve të prokurimit”, duke theksuar transformimin rrënjësor të vendit dhe renditjen e Shqipërisë si lider në Ballkanin Perëndimor për modernizimin dhe integritetin e prokurimeve publike, sipas raportit të SIGMA-s.
Kryeministri njoftoi gjithashtu se 2,200 të rinj përfitojnë aktualisht nga programi i Garancisë Rinore, ndërsa deri në fund të këtij mandati pritet të mbështeten rreth 60 mijë të rinj. Programi, me fond prej 63,5 milionë eurosh, është pjesë e Strategjisë Kombëtare të Punësimit dhe Aftësive 2023-2030 dhe synon të përgatisë dhe të mbështesë të rinjtë në tregun e punës.