Close Menu
    Youtube
    Botë

    Video/ Tërmeti 7.4 ballë trondit Meksikën, pamjet tregojnë ndërtesat që lëkunden dhunshëm, banorët dalin në panik

    Një tërmet i fuqishëm me magnitudë 7.4 të shkallës Rihter goditi brigjet jugperëndimore të Meksikës, duke shkaktuar momente paniku mes banorëve dhe duke aktivizuar menjëherë sistemet e paralajmërimit për cunami.

    Sipas Shërbimit Gjeologjik të Shteteve të Bashkuara (USGS), epiqendra e tërmetit u lokalizua rreth 71 kilometra në jugperëndim të Puerto Madero, në shtetin Chiapas, ndërsa lëkundja u regjistrua në një thellësi prej rreth 10 kilometrash.

    Menjëherë pas goditjes, Qendra Amerikane e Paralajmërimit për Cunami në Paqësor (PTWC) lëshoi një alarm për valë të mundshme cunami në zonat bregdetare brenda një rrezeje prej 300 kilometrash nga epiqendra.

    Lëkundjet u ndjenë edhe në Guatemalë dhe El Salvador. Në kryeqytetin e Guatemalës, ndërtesat u tronditën fort, duke detyruar qindra persona të braktisnin zyrat dhe banesat. Mediat lokale publikuan pamje nga evakuimi i një godine qeveritare menjëherë pas tërmetit.

    Ndërkohë, në rrjetet sociale janë shpërndarë video që tregojnë momentin kur ndërtesat lëkunden me forcë, ndërsa disa prej tyre duken sikur “kërcejnë” nga intensiteti i goditjes sizmike. Pamjet pasqyrojnë panikun e qytetarëve, të cilët dolën me nxitim në hapësira të hapura.

    Deri tani, autoritetet nuk kanë raportuar për viktima apo dëme të mëdha materiale. Ekipet e emergjencës vijojnë kontrollet në zonat e prekura, ndërsa situata po monitorohet për shkak të rrezikut të lëkundjeve pasuese dhe zhvillimeve të mundshme në zonat bregdetare.

    Share.