Presidentja e përkohshme e Venezuelës, Delcy Rodríguez, njoftoi shpalljen e një amnistie të përgjithshme politike dhe mbylljen e qendrës së paraburgimit El Helicoide, më pak se një muaj pas kapjes së presidentit Nicolas Maduro gjatë një operacioni ushtarak amerikan.
Duke folur para Gjykatës Supreme, Rodríguez deklaroi se qeveria do t’i paraqesë parlamentit një ligj amnistie që mbulon periudhën e dhunës politike nga viti 1999 deri më sot, me qëllim “shërimin e plagëve të konfliktit politik” dhe rikthimin e bashkëjetesës kombëtare.
Ajo konfirmoi gjithashtu se El Helicoide, i cilësuar nga opozita dhe organizatat e të drejtave të njeriut si një qendër torture për të burgosurit politikë, do të mbyllet dhe do të shndërrohet në një qendër sociale, kulturore dhe sportive.
Sipas autoriteteve, mbi 800 të burgosur politikë janë liruar, ndërsa organizata Foro Penal raporton se lirimet janë më të pakta dhe se qindra persona mbeten ende në paraburgim. Njoftimi u prit me shpresë nga familjarët e të arrestuarve.
Megjithatë, Foro Penal paralajmëroi se amnistia nuk duhet të çojë në pandëshkueshmëri dhe se nuk mund të përfshijë shkelje të rënda të të drejtave të njeriut apo krime kundër njerëzimit.
Ndërkohë, liderja e opozitës Maria Corina Machado deklaroi se masat janë rezultat i presionit amerikan dhe jo vullnet i qeverisë. Zhvillimet vijnë në një moment afrimi diplomatik mes SHBA-së dhe Venezuelës, pasi Uashingtoni konfirmoi se nuk ka më shtetas amerikanë të paraburgosur në vend.