Mbledhja e këshilltarëve socialistë të Bashkisë së Tiranës në selinë e PS përfundoi rreth orës 18:30, duke vendosur të shtyhet përpara kërkesa për shkarkimin e kryebashkiakut Erion Veliaj, i cili ndodhet në paraburgim prej 7 muajsh.
Burime nga mbledhja për A2 CNN bëjnë me dije se kërkesa mbështetet në mungesën e Veliajt në detyrë për më shumë se 3 muaj dhe pasqyron pjesërisht fjalën e kryeministrit Edi Rama, që hapi rrugë zgjedhjeve të pjesshme për kryeqytetin, duke propozuar ish-ministren e Arsimit Ogerta Manastirliu.
Ndërkohë, këshilltari Aldo Mërkoçi ka shfaqur rezistencë për të firmosur kërkesën, duke kërkuar të përfshihen fjalë për kontributin dhe punën e mirë të Veliajt, por në fund firmosi bashkë me kolegët.
Mbledhja e Këshillit Bashkiak të Tiranës, ku do të merret vendimi përfundimtar, është caktuar për të martën e ardhshme në orën 16:00.