Arbër Veliaj, vëllai i kryebashkiakut të arrestuar të Tiranës, Erion Veliaj, është paraqitur sot në ambientet e SPAK. Ai do të merret në pyetje nga prokurorët si person që ka dijeni për hetimet që po zhvillohen në dosjen ndaj të vëllait.
Tre javë më parë, Gjykata e Posaçme e Apelit rrëzoi një ankimim të Arbër Veliajt, i cili kundërshtonte kontrollet e SPAK të kryera në dhjetor të vitit 2024 në banesat dhe bizneset e tij. Fillimisht, Gjykata e Lartë, me një vendim të datës 25 maj, kishte pranuar rekursin dhe kthyer çështjen për rigjykim, por Apeli i Posaçëm e rrëzoi sërish kërkesën, duke lënë në fuqi vendimin e dhjetorit për ushtrimin e kontrolleve.
Ndërkohë kujtojmë se Erion Veliaj dhe bashkëshortja e tij, Ajola Xoxa, po hetohen nga SPAK së bashku me 6 biznesmenë të tjerë për akuza që lidhen me korrupsion, pastrim parash dhe fshehje pasurie.