Gjykata Themelore në Prishtinë, dega në Lipjan, ka caktuar masën e paraburgimit prej 30 ditësh për pesë zyrtarë policorë të përfshirë në rastin e vdekjes së 27-vjeçarit Agon Zejnullahu. Policia dyshohet se ka përdorur forcë të tepruar gjatë ndërhyrjes, çka dyshohet se çoi në vdekjen e të riut më 7 korrik në Lipjan.
Zëdhënësja e gjykatës, Mirlinda Gashi, konfirmoi se vendimi u mor pas shqyrtimit të kërkesës së Prokurorisë Themelore të Prishtinës, e cila i akuzon zyrtarët për veprën penale “vrasje nga pakujdesia”.
Sipas dosjes hetimore, ngjarja ndodhi në orët e para të mëngjesit në rrugën “Hajredin Bajrami”, ku Agon Zejnullahu dyshohej se po kryente veprime të dhunshme ndaj kalimtarëve dhe automjeteve. Policia intervenoi në vendin e ngjarjes, por ndërhyrja degjeneroi në një përballje fizike që përfundoi tragjikisht.
Prokuroria përshkruan momentet kur Zejnullahu tentoi të largohej dhe si policët përdorën forcë për ta neutralizuar – përfshirë përdorimin e sprejit lotsjellës dhe mbajtjen e tij me forcë në tokë. Në dosje theksohet se njëri nga zyrtarët vendosi gjurin në shpinën e Zejnullahut, afër qafës, ndërsa të tjerët e mbanin nga krahët dhe këmbët për ta prangosur. Nga kjo ndërhyrje, ai dyshohet se humbi jetën për shkak të pakujdesisë së treguar gjatë arrestimit.
Të ndaluarit janë: Albian Retkoceri, Artidon Konxheli, Liridon Rrahmani, Ibrahim Nela dhe Endrit Beqiri. Inspektorati Policor i Kosovës ka rekomanduar suspendimin e tyre ndërsa hetimet janë në vijim.
Rasti ka shkaktuar reagime të forta publike dhe kërkesa për transparencë dhe përgjegjësi institucionale. Autoritetet janë duke vazhduar hetimet për të zbardhur të gjitha rrethanat e ngjarjes.